Untitled

Boluntaryo ang Pagsapi sa Segundaryo!

(Nobyembre 21, 2001)

BUMABATI po kami ni Joydee sa organizers at participants nitong 2nd Metro Manila Coop Congress noong Nobyembre 12-14 sa Manila Midtown! Malaking ambag po ito sa mga pagsisikap na palakasin ang kilusang kooperatiba sa bansa.

Tama 'yan! Lalupa't sinabi mo nga na sa bawat syudad, bayan at distrito, nagdaos muna ng cooperative congresses. Magandang ugat po ng proseso sa antas na regional ang ganoong mga lokal na pagpupulong. Kaya lang, mga kaibigan, ako’ng taga-Taguig, pero ‘tong katambal ko ang nakadalo sa Taguig-Pateros Coop Congress!

Ang maganda talaga niyan, at nakita ko nga sa sarili kong mga mata, maraming primarya ang dumalo sa mga district o city congresses. May mga primary coop leaders pa nga roon na noon pa lang nakahalubilo ng mga nagmula sa iba pang koop!

Aba, mag-usap-usap lang at magpalitan ng mga karanasan ang mga lider at kasapi ng iba't ibang koop, siguradong makakadama na sila ng pagsasanib-sanib ng kanilang lakas, kahit man lamang ng diwa nilang magpalakas ng sari-sarili at makapaglingkod nang husto sa kani-kanilang mga myembro!

Pero, alam mo, kahit napakahalaga ng papel ng mga segundaryong koop para makabig sa mas malaking pagkakaisa ang mga primaryang nakabase sa iisang teritoryo, di pa rin pwedeng sapilitan ang pag-recruit ng mga unyon at pederasyon ng mga primaryang isasapi.

Bakit mo naman sinabi 'yan? Meron bang nag-isip na ganoon? Pilitan?

Oo naman. Kasi nga, mahirap talagang tulungan ng segundaryo ang isang primaryang di man lamang nagpapasyang sumapi. At meron pa ngang probisyon sa Coop Code, na hinalaw sa Prinsipyo 6 ng International Cooperative Alliance, na dapat talagang bawat koopay makipag-ugnayan sa iba pang kooperatiba sa iba-t ibang panteritoryong antas. Di nga lang tinukoy na pagsapi lang ang pakikipag-ugnayan. Sa biglang tingin, pwede naman talagang ang maging interpretasyon diyan ay gawing requirement sa bawat primarya ang pag-anib sa segundaryo.

Pero, teka! Sabi mo eh sa biglang tingin. Para sa akin, wala dapat pilitan kahit saan, eh!

Tama rin iyon, at ganyan naman talaga ang pangkalahatang diwa ng probisyon sa ating mga Constitution tungkol sa citizens' right to assembly and association. Karapatan itong pwedeng gamitin, pero walang parusa kung di mo ginagamit.

Eh yun na ngang pagboto na malinaw na tungkulin ng mamamayan, wala pa ring dapat iparusa sa ayaw bumoto!

May nagsabi pang di raw aplikable ang Principle 1 (Open and voluntary membership) sa mga primaryang pinasasapi sa segundaryo dahil hindi sila "persons" kundi mga organisasyon. Pero nalilimutan d'yan na ang salitang "persons" sa batas ay maaaring "natural" o "juridical," at ang mga koop, kompanya, at asosasyong nakarehistro sa pamahalaan ay maituturing na "juridical persons" na maaaring maghabla at ihabla. Aplikable sa bawat kooperatiba sa lahat ng antas ang kinakailangang katangiang boluntaryo ang pagsapi dito ayon sa Principle 1.

Basta, sa akin, requirement man o boluntaryo, ang pinakaimportante pa rin ay ang epektibong pangungumbinse ng alinmang koop na may mapapala talagang maganda ang hinahatak niyang mag-myembro. Kumusta na ba ang katayuan ng mga nag-myembro na? May nadarama bang pag-aangking-lakas o empowerment sa pagsasama-sama? May napapala bang asenso at serbisyo? Nakakayanan ba silang aktibong paganahin at paunlarin bilang mga myembro? I-encourage na lang nila nang mabuti sa aktwal na performance! Walang pilitan! Di rin naman mag-aktibo bilang myembro ang mga yan pag pinilit lang, eh! Dadami lang sila!

Nadale mo! Ganoon na nga ang naging kongklusyon sa talakayan ng workshop group na sinalihan ko sa panrehiyong konggreso. Kasi, sa biglang tingin, mas madaling paraan yon ng konsolidasyon. Pero sa totohanan nang pag-andar at sa mas matagalan, malaking sakit ng ulo ang ibibigay sa sinumang kailangang mamuno sa mga myembrong pinilit lamang!

Please join our 'Sanib-Sinag'

(synergy of minds), through this

'CYBER TALK-BACK'

in selected SanibLakas webpages:

Webmaster will send your response ASAP

to your and the author's) e-mail addresses;

SANIBLAKAS CYBERSERVICES is

a service project of SanibLakas Foundation.

What are your comments and questions?

Your Name & Nickname::
Position:
Organization, Office, School or Barangay:
Mailing / E-mail Addresses Fax & other numbers:
Personal or work background rele- vant to the comment or inquiry:
S E N D -->	BACK to TOP